Tottenhamspelarane i VM: Gruppespelet
Tottenhamspelarane i VM: Gruppespelet
Hugo Lloris
Christian Eriksen
Ein annan Tottenham-spelar som har levert gode kampar i gruppespelet er
Christian Eriksen. Talismanen til det danske fotballandslaget har vore svært
delaktig i alt Danmark har gjort. I den første kampen mot Peru hadde han ein
frustrerande 1. omgang, der han slo mange dårlege dødballar. I ope spel hadde
han rett nok lite å spele på, sidan medspelarane hans ikkje hadde spesielt gode
løp. I 2. omgong var han meir "på hugget" og han vart avgjerande då
han slo Yussuf Poulsen gjennom åleine med keeper. Etter den fine
assisten kom han åleine med keeper ved eit høve, men klarte ikkje å sette
den i mål. Han var ikkje banens beste i denne kampen (det var målvakt Kasper
Schmeichel), men det var lett å sjå kor viktig han er for laget. I kamp nummer
to mot Australia starta kampen på best mogleg vis. Nicolai Jørgensen la ballen
igjen til Eriksen som kom på eit svært bra løp. Han dundra ballen i mål frå ca. 14 meter på ein slags volley. I motsetnad til Peru-kampen var playmakeren meir
involvert i 1. omgang enn i dei neste 45 minutta. I "gruppefinalen"
mot Frankrike var begge lag fornøgde med uavgjort, noko som gjenspegla seg i
kampen som enda 0-0. Eriksen forsøkte seg frå distanse fleire gangar, men
hadde ikkje hellet med seg. Alt i alt spelte han kvart einaste minutt av
gruppespelet, samstundes som han var ein av dei som sprang mest. Han er Danmark
sin klart viktigaste spelar, og var svært involvert i begge måla deira. Danmark
møter eit sterkt Kroatia-lag på søndag kl. 20.00.
Karakter: 8,5
Heung-Min Son
Heung-Min Son er, likt med Christian Eriksen, talismanen til
landslaget sitt. Den første kampen mot Sverige var hans verste i
gruppespelet, der han ikkje fekk til så mykje. Sør-Korea var det klart beste
laget i starten, men etter kvart tok Sverige over kampen og vann fortent. Han
var farleg frampå på høgrekanten til tider, men fekk ikkje til noko spesielt.
Mexico-kampen var også svært frustrerande for det asiatiske laget og Son, som
tapte 1-2 til slutt. Son hadde mange forsøk i løpet av kampen, og hadde ein
stor trippelsjanse tidleg i kampen. Han fekk målet sitt på overtid av overtida, og
det var nydeleg utført. Han benda ballen heilt ute i sida med
venstrefoten, men målet kom litt for seint for at Sør-Korea skulle få med seg
noko frå kampen. I den siste kampen mot Tyskland var Sør-Korea lågtliggande, og
dei klarte å frustrere Tyskland. Dei heldt dei unna heilt til overtida, då dei
kontra inn måla sine. Kampen enda 2-0 og Son scora mål nummer to. Neuer var på
bærtur og mista ballen til ein motspelar. Han slo Son gjennom, og han sprang frå
den næraste forsvararen og sette ballen i det ope målet. Heung-Min Son leverte
absolutt eit bra gruppespel, men prestasjonane hans var akkurat ikkje nok
til å vere med i kampen om avansement. Han spelte alle minutta, scora begge måla
sine på overtid, og fekk eit gult kort for filming i den siste kampen, noko ein
naturlegvis ikkje vil sjå. Alt i alt var Son Sør-Korea sin stabilt beste spelar
(Keeperen deira, Hyeon-Woo Jo, var fantastisk mot Tyskland, men ikkje like god
mot dei andre).
Karakter: 7,5
Toby Alderweireld
Midtstoppargeneralen Toby Alderweireld leverte eit solid gruppespel.
Han var med på å halde "buret" reint mot Panama i den første kampen,
noko ein kunne forvente mot såpass svak motstand. Panama skapte ein stor sjanse
litt ut i 2. omgong, men elles hadde Belgia og Alderweireld god kontroll og
"cruisa" inn til ein 3-0-siger. Alderweireld var, som han er kjend, god i pasningspelet, spesielt i oppspelingsfasa. Den neste kampen
mot Tunisia var svært målrik og enda til slutt 5-2. Dette vil nok ikkje det
belgiske forsvaret vere nøgde med, sjølv om dei vann komfortabelt med tre
mål. Alderweireld leverte nok ein bra kamp, og han viste fram den fantastiske
pasningsfoten sin på 4-1-målet. Han sentra då ei millimeterpresis langpasning til
Eden Hazard som sette ballen i mål åleine med keeper. Dette har vi sett han og
Dele Alli gjere fleire gongar for Tottenham, spesielt i 2015/2016-sesongen.
Alderweireld vart, saman med dei fleste andre, kvilt i den siste og uviktige
kampen mot England. Sjølv om Belgia ikkje møtte spesielt god motstand, så
leverte Alderweireld solide og gode kampar, noko som viser at han er ein svært
profesjonell idrettsutøvar. Assisten hans var høgdepunktet av prestasjonane
hans.
Karakter: 8
Mousa Dembele
Mange hadde nok trudd at den sentrale midtbanespelaren skulle vere med
frå start i dei viktige kampane, men Roberto Martinez hadde andre tankar. Axel
Witsel, som spelar i Kina, startar framfor han, noko som rett og slett er
ganske merkeleg. Mot Panama kom han inn i det 74. minutt i ein allereie avgjort
kamp, og han var med på å trygge inn sigeren. I neste kamp mot Tunisia kom han
ikkje inn i det heile tatt. I den betydningslause kampen mot England fekk han
derimot spele frå start. Han spelte ein heilt grei kamp, der han hadde rimeleg
bra kontroll på midtbana. Kampen var prega av lågt tempo, og ein kan nesten
ikkje telle det som ein offisiell kamp. Vi får håpe at vi får sjå meir av
Dembele i sluttspelet, Tottenham-fansen veit godt kor mykje talent som bur i
han.
Karakter: 6
Jan Vertonghen
"Super Jan" har hatt eit svært likt gruppespel som
midtstopparmakkeren Toby Alderweireld. Han var også med på å halde
"nullen" mot Panama, samstundes som han pådrog seg eit gult kort. Han
var sikker, påliteleg og god i oppspelingsfasa. Han kjefta også ein god del på
Yannick Ferreira-Carrasco som spelar vingback i 3-4-3-systemet til Roberto
Martinez. Han spelar til vanleg på vingen, noko som gjer at Vertonghen er den
einaste med defensive fiber på venstresida av forsvaret. Han spelte 90 minutt
også i kampen mot Tunisia der Belgia slapp inn to mål. Vi kan forvente at
Belgia blir testa meir i sluttspelet enn dei har blitt no, noko som kan gjere
at ein får sjå kvaliteten som bur i den belgiske midtstopparen. Han vart også
kvilt i England-kampen. Belgia kjem til å møte Japan i neste kamp, noko som bør
vere overkomeleg motstand for Vertonghen & co, sjølv om Japan har vore
betre enn mange hadde forventa.
Karakter: 7
Dele Alli
Den offensive midtbanespelaren har fått gruppespelet sitt øydelagd av
ei skade han pådrog seg i den første kampen mot Tunisia. Han starta mot Tunisia
og hadde nokre gode involveringar der han blant anna skapte ein stor sjanse for
Jesse Lingard, men hadde elles ein ganske dårleg kamp. Det såg ut som om han
spelte med skada heilt frå seint i 1. omgong til det 80. minutt, då han vart
bytta ut. Han har ikkje spelt sidan han vart bytta ut, men ein kan forvente at
ein får sjå han i løpet av sluttspelet. Alle som har fulgt med på Premier League
veit at han er ein fantastisk fotballspelar, og som kan spele i fleire roller -
både som kreativ og/eller målfarleg offensiv midtbanespelar.
Karakter: 5
Eric Dier
Den anvendelege forsvars-/midtbanespelaren har ikkje hatt eit optimalt
meisterskap hittil. Det er klart at Gareth Southgate føretrekk Jordan
Henderson framfor Dier. Fleire vil hevde at Dier er ein betre fotballspelar enn
Henderson, men det at Henderson lenge har vore kaptein gjer nok at han er
førstevalet til trenaren. Dier fekk såvidt kome inn mot Tunisia, men spelte
ikkje i det heile tatt i storsigeren mot Panama. Han spelte derimot heile
kampen mot Belgia som ikkje var av noko betydning. I denne kampen var Belgia
det førande laget, og Dier leverte ein middelmådig kamp. Dette er mest sannsynleg
den siste gongen han startar ein kamp i dette meisterskapet, og han vil nok
vere skuffa over dette. Han kjem til å kome innpå dersom England vil trygge inn
ei leiing e.l. Dier har nok dei komande meisterskapa i sikte, der ein kan
forvente at han vil spele frå start, dersom han klarer å oppretthalde
framgangen.
Karakter: 4
Harry Kane
Det engelske landslaget sin kaptein har levert som forventa, om ikkje
meir, hittil i meisterskapet. I 1-2-sigeren mot Tunisia vart han heilt
avgjerande, sidan han scora begge måla etter corner,
der det første målet vart scora med beina på ein retur, medan det andre målet
vart heada inn. Det siste målet var på overtid - noko som gjorde scoringa ekstra
spesiell. I tillegg skapte han mykje trøbbel for forsvaret, og skulle hatt
straffe etter at trøya hans vart til eit segl på fleire dødballar. I
Panama-kampen heldt Kane fram med å score mål. Han var den første engelske
spelaren som scora hat-trick i VM sidan Gary Lineker, noko som viser kor
spesiell Harry Kane er. To av måla var rett nok på straffespark, men straffene
var bortimot perfekte ettersom han limte dei i det same krysset begge gongane.
Kane vart, saman med mange andre, kvilt i Belgia-kampen, noko som gjer at han
er ekstra utkvilt til sluttspelet. Ein kan forvente seg fleire mål frå det som
foreløpig er VM sin toppscorar med 5 mål.
Karakter: 10
Danny Rose
Danny Rose har, likt med Eric Dier, hatt eit skuffande VM hittil. Han
kom ikkje inn på bana i kampen mot Tunisia, men fekk spele litt over 20 minutt
mot Panama. Ashley Young har blitt Southgate sitt førsteval, noko som skuldast
den skuffande sesongen Rose har hatt. Han fekk starte mot Belgia, men viste
kvifor han ikkje har fått starte dei andre kampane. Han vart finta på ræva av
Adnan Januzaj på målet, og skulle ha klart å avverge situasjonen. Det blir
spennande å sjå om Danny Rose klarer å nå nivået han hadde før langtidsskada
han pådrog seg i januar 2017.
Karakter: 3
Kieran Trippier
England sin høgre-vingback har kanskje vore deira nest beste spelar
hittil i meisterskapet. Med sine presise dødballar og innlegg som blir piska
inn, har han vore ein viktig ressurs for laget. Mot Tunisia var han aktiv,
involvert og avgjerande for sigeren. Dødballane han slo traff som regel alltid
pannebrasken til Harry Maguire, som anten flikka den vidare eller prøvde å
score sjølv. Det avgjerande overtidsmålet kom etter at Trippier traff Maguire
sitt hovud, som sendte ballen vidare til Kane, som heada den sikkert i mål.
Utanom dette hadde han ei svært god pasning til Jesse Lingard som skaut i
stanga etter å ha blitt spelt åleine med keeperen. I kampen mot Panama skaffa
han seg assist då John Stones heada ballen i mål etter ein godt slått corner.
Han vart bytta ut i det 70. minuttet og England slapp inn mål 7 minutt seinare.
Tilfeldig? Trippier stod også over mot Belgia, men han er garantert tilbake frå
start mot Colombia kl. 20.00 på tysdag.
Karakter: 9
Davinson Sanchez
Den colombianske midtstopparen hadde eit gruppespel med varierande
prestasjonar. Den første kampen mot Japan var ei farse av Colombia. Carlos
Sanchez vart utvist allereie etter 4 minutt, der dommaren meinte at han hadde
tatt ballen med handa inne i 16-meteren, noko som var i grenseland. Før
hands-situasjonen rota Sanchez det til i forsvaret, noko som gjorde at Japan i
det heile tatt kom seg innanfor 16-meteren til Colombia. Han skulle ha klart å
avverge situasjonen, men i staden stod det 0-1 til Japan. Litt seinare i
omgangen lot Sanchez ein japanar kome til skot altfor lett, og han spelte
rett og slett ein dårleg kamp, som kunne ha kosta laget avansement. I kamp nummer
to mot Polen var midtstopparen mykje betre. Lewandowski kom seg til nokre
sjansar, men Colombia heldt nullen og vann kampen 0-3 på strålande vis.
Søramerikanarane viste kvifor dei er eit svært bra fotballag, og sendte Polen
på "hovudet og ræva" ut av meisterskapet. Den siste kampen mot
Senegal var anspent, og tidleg i kampen fekk Sanchez ei straffe dømt mot seg
etter at han takla Sadio Mané. Sanchez var derimot på ballen, noko VAR fekk med
seg, og Senegal fekk ikkje straffe. Utanom dette hadde Sanchez og resten av
forsvaret rimeleg bra kontroll, og dei skal klare å gi England ein god kamp i
8-delsfinalen tysdag kl. 20.00. Alt i alt retta Sanchez opp feila han gjorde
i den første kampen med to "reine bur", og var dermed ein viktig del
av Colombia sitt avansement.
Karakter: 7
Oppsummering
11 av 12 Tottenham-spelarar som har delteke i VM har gått vidare frå
gruppene sine og til sluttspelet, noko som må seiast å vere ein god prestasjon.
8 av desse spelar rett nok for Belgia og England som var heldige med
motstanden dei møtte i gruppa. Hugo Lloris og Frankrike var også soleklare
favorittar til å gå vidare frå gruppa si. Christian Eriksen har vore svært
delaktig på å sende Danmark vidare, noko som kanskje er den største
prestasjonen av alle Tottenham-spelarane i gruppespelet. Davinson Sanchez
starta "shaky", men var med på å "stenge butikken" i dei to
neste kampane, noko som sendte Colombia vidare. Heung-Min Son var den einaste
som ikkje gjekk vidare, og det skulle mykje til for å slå ut Tyskland, Mexico
og Sverige. Dei reiser derimot frå VM med siger mot den regjerande
verdsmeisteren, noko dei kan vere svært nøgde med. Alt i alt har VM vore ein
stor suksess for Tottenham-spelarane hittil.
Kommentarer
Legg inn en kommentar